زواج القاصرات مسلسل لم ينتهى بعد .

زواج القاصرات مسلسل لم ينتهى بعد .

رغم كل تشديدات القانون على سن الزواج الا ان بعض الناس

لم تتراجع بعد عن تلك الفكرة العقيمة التى تقضى على الطفولة بالنسبة للبنت فبين عشية وضحاها تصبح تلك الطفلة القاصر التى لا تدرى اى شئ بامور الحياة زوجة وراعية فى بيت زوجها …. ومسئولة عن رعيتها رغم عدم قدرتها على ان تكون مسئولة عن نفسها حتى …..

فى استشارة اليوم اقدم لكم موقف اشبه بفيلم رعب تعيشه اسرة ويتحمله الاخ اذ هو ولى الامر بعد الاب

-الو استاذة مى رفعت المحامية معايا

ايوة يا فندم معاك اهلا وسهلا بيك

-الحقينى انا فى مصيبة

خير مصيبة ايه بس ربنا ما يجيب مصايب

-بصى اختى اتجوزت من سنة ومعندهاش ولاد جوزها وراها النجوم فى عز الضهر حتى شرب المخدرات علمه لها وبقيت مدمنة بسببه …

لحظة بس ليه متكونش اختك هى الغلط من الاول وليه متطلقتوهاش من الاول ؟

-يا استاذة اختى لسة مكملة ١٨سنة السنة دى وهو بيساومنا على فلوس مقابل انه يكتب عليها اصلا … رغم اننا فارشين البيت بقايمة تقدر بمبلغ كذا والمفروض لها مؤخر كذا

والبنت قبل ما تتجوز كانت كويسة جدا الف مين يتمناها بس جوزناها بعقد عرفى وقولنا لما تكمل السن القانوني نبقا نكتب رسمى وبعد الجواز ظهر على حقيقته ومفيش حاجه معانا تثبت انها مراته حتى .

طيب يا استاذ م هسألك سؤال واحد بس انتوا بتعملوا فى البنات كدة ليه

كسبت ايه من جوازتها هو انتوا لو صبرتوا عليها السنة دى تكبر حتى كان هيحصل ايه ليه بتستعجلوا وترموهم لاقرب حد يخبط من غير حتى ما يبقوا مؤهلين للجواز او عندهم فكرة يعملوا ايه

عموما يا استاذ م مفيش مشكلة ملهاش حل قانونى لكن الحل مش سهل وده بسبب مخالفة القانون من الاول

بص يا استاذ م فى القانون يمكن اثبات الزواج العرفى عن طريق دعوى اثبات زواج

يعنى اختك متزوجة دلوقتي عرفى وزوجها رافض يعترف بالزواج اصلا وانتوا عايزينها تطلق

فاحنا هنعمل ايه

هنرفع الاول اثبات زواج ليها وناخد حكم من المحكمة بإثبات الزواج وبعد كدة نبدأ نرفع دعاوى طلاق وقايمة منقولات ومؤخر الخ

وطبعا ولى الامر والمأذون او المحامى اللى كتب العقد هيتعاقب وفق القانون بعقوبة تأديبية لانه زوج قاصر دون سن الزواج

-طيب يعنى يا استاذة حقها هيجى بالقانون ؟

ايوة طبعا حقها ممكن يرجع مفيش مشكلة ملهاش حل

لكن للاسف حقها في حياة طبيعية صعب سمعة اختك هتبقى قدام الكل متزوجة عرفى ولو لاقدر الله معرفتش تثبت الزواج ده هيضيع كل حاجة ده اول كارثة

ثانياً انت نفسك هتتعاقب قانونيا

ثالثاً وده المهم لو جيبتلها فلوس هترجع لها نفسيتها وحياتها وكبرها قبل الاوان ازاى

تفتكر كان فى حاجة فى الدنيا تستاهل نجوز بناتنا قبل سن الجواز ونحطهم فى الموقف ده .

بقلم مى رفعت المحامية ونائب رئيس لجنة تقصى الحقائق في منظمة الاتحاد المصري لحقوق الإنسان.